Cunqueiro, Blanco Amor e a Galician Gay Question

28 Aug
Eduardo Blanco Amor

Eduardo Blanco Amor

No corazón da rúa Marqués de Valladares, á beira do teatro García Barbón, na porta do Hotel Inffinit (o que foi noutrora o Hotel Nilo), unha placa debería advertir: “Aquí se deron a man a morte e Eduardo Blanco Amor“. Foi un 30 de novembro de 1979. O corazón falloulle na habitación do seu Marienbad vigués e levárono nun taxi, “nada de panos polo cristal, por favor”, á clinica do doutor Toscano, no Calvario, onde finou. No outro extremo da rúa, no número 20, fronte a un soar no que foron achados restos de salinas romanas e pegado a un predio racionalista do arquitecto Francisco Castro, si hai unha placa. “Álvaro Cunqueiro viviu e traballou nesta casa de 1962 a 1981″. Máis nada. Dous escritores, dous amigos, unidos por unha mesma rúa, por unha carta de 1949 que expresa unha vivencia común da soedade e por un singular artigo de Cunqueiro sobre a Gay Question, publicado en Sábado Gráfico en 1976; un tempo no que amar a quen un quería era habitar nas marxes da lei e no corazón dos parques, aínda que Cunqueiro non o comprendera.

Placa na casa de Cunqueiro en Marqués de Valladares. Foto: B.R.S.

Placa na casa de Cunqueiro en Marqués de Valladares. Foto: B.R.S.

Saiban cantos estas cartas viren… Álvaro Cunqueiro e Alberto Casal (1955-1961) fai o número XXIII dos Cadernos Ramón Piñeiro. O volume, ao coidado de Luís Cochón, compila o carteo de Cunqueiro co notario vigués e amigo da alma do escritor, Alberto Casal, con despacho na rúa Reconquista, a mesma da Editorial Galaxia, perpendicular a Marqués de Valladares. As cartas son, en por si, un prodixio literario e unha fonte de coñecemento diverso, a destilación de dous intelectos nada comúns. Confesións persoais, lecturas, anécdotas familiares, descricións de procesos creativos e editorais, amargura polo devir das cousas, complicidade e cariño. Todo iso.

No inicio desa compilación Cochón incluiu a única carta conservada entre Cunqueiro e Eduardo Blanco Amor, cedida por César Cunqueiro. É unha carta de EBA a Álvaro, singular polo achegamento que revela entre os dous e porque Eduardo se bota a falar de amor e sentimentos íntimos. Está datada en Baiona un 30 de xullo de 1949 e foi escrita á beira do mar. “En seguida, al anochecer, me bañaré y nadaré entre las rocas, sobre ese abismo impreciso de luz verde entre tinieblas”. Di Blanco Amor:

“Cuando venía, pensaba en mí. Y en ti, los dos estamos solos -tú más que yo- interiormente y yo aún lo estaré más, como si en mi soledad cada vez más perfecta fuese a encontrar aquello que mi alma anhela y que reiteradamente la vida nos negó: amor, permanencia…, que sé yo, acaso una luz -una llama, dices tú, mejor- apretada a nuestros labios que no anhelarían nada más que un contacto glorioso, su quemante beso”.

Blanco Amor cóntalle a Cunqueiro que nese mesmo ano asistiu ao fracaso de dous sentimentos, o amor e a amizade, “después de su más cumplida culminación”. E continúa máis adiante:

“Muchos, ante la esquivez de las cosas, ante su duro y frío existir, ya no quieren amar más. Pero ¿pueden decirte que viven, siempre en estado de defensa o tan fríos, tan cáusticos por la vida y sus zarpazos que parecen no tener corazón?”.

Ao mellor equivócome pero o carácter desprexuiciado e algo arrogante de Blanco Amor -pagán, hedonista, intelixente, provocador e pouco dado a se ocultar- propicia unha misiva que destaca pola súa expresión certa e sen voltas, algo moi raro, abofé, na pudorosa produción dos literatos galegos, seareiros do rigor expresivo no que as cousas do corpo e do peito se refire. Por algo Blanco Amor bateu tantas veces co lapis vermello da censura.

Cunqueiro

Álvaro Cunqueiro

Cunqueiro sabía, de certo, que eses amores do Eduardo nada tiñan a ver coa heterosexualidade normativa que ditaba a tradición patriarcal e, naquel tempo, mesmo a lei. E iso engádelle máis valor ás súas confesións mutuas. Así que cavilando eu nesa faceta de amigo dos seus amigos batín cun texto moi sorprendente do señor de Mondoñedo. É un artigo publicado en 1976 en Sábado Gráfico e fai parte da compilación que vén de publicar o selo Follas Novas das colaboracións do autor nesa revista durante a Transición. Titúlase Spartacus Gay Guide e glosa, con ironía e un distanciamento arraiano do sarcasmo crítico, a publicación ese ano da guía gay máis internacional, que “nos da 5000 direcciones que interesan a los chicos, y no chicos, de la banda, en 850 ciudades de cien países diferentes”. Os enderezos, apunta, non son decote enderezos senón “una algo vaga indicación de posibles encuentros fortuítos”. E sinala:

Como, por ejemplo, en Vigo, donde resido, se asegura que pueden darse tales encuentros en los jardines de orillamar, donde llamamos las Avenidas, o en los jardines de la Comandancia de Marina, que llamamos muy respetuosamente Jardines del Obispo Eijo Garay”.

Spartacus-1975-522x1024

Exemplar de Guía Gay Spartacus de 1975

A Cunqueiro, cunha ironía demasiado fina que denota certo disgusto, parece sorprenderlle que a Guía Gay lembre a existencia en España (estamos en 1976, democracia, si) de “tres campos de concentración para internar exclusivamente homosexuales españoles” e faise eco das recomendacións dos editores da guía, que aconsellan non viaxar a  España, en parte para protestar pola represión e en parte porque a Garda Civil “cito textualmente -di Cunqueiro- dispara sobre más de cinco personas por día, bajo el pretexto, por ejemplo, de que ponen en peligro la moral pública”.

Cunqueiro acha frívola e redutora a listaxe de bares, saunas, cines, clubes e espazos de ligue. Critica a superficialidade coa que a guía aborda “el gran problema de la homosexualidad, un serio problema (…) que quizá deba y pueda ser solucionado” e apela aos gays literarios que ten a man: Gide, Green, Montherlant. “Ni Óscar Wilde querría eso, y mucho menos Aschenbach contemplando a Tadzio en la playa del Lido veneciano”. Morte en Venecia, un clásico. Querse dicer: o platonismo homosexual, en canto drama persoal, é apto, digno de consideración: o desenfreo, o vicio e a visibilidade semella que non. Ignoro se esa estrita marxe tamén a aplicaba Cunqueiro á vivencia da heterosexualidade en xeral, ou á súa propia, pero sospeito que non.

Para pechar o artigo Cunqueiro fai unha referencia a Galicia e á “gay question” no que, fóra da conveniencia ou non do seu contido, é, ao meu ver, unha das citas máis explícitas arredor da homosexualidade da man dun autor galego do século pasado:

“En Galicia, tradicionalmente, nunca se le ha dado la menor importancia a los homosexuales. Si salía alguno en una aldea la gente se reía. Mi querido amigo, el gran escultor Faílde, creía que se trataba de una invención de París, y que tal tipo no podía haberlo. (…) Ahora parece que en las ciudades algunos más se muestran, pero en la Galicia rural y marinera es muy difícil señalar a uno con el dedo, aun reduciéndose a sospechar. Quizá porque en Galicia Los nietos de los celtas, que tituló en una novela muy mala, pero que resultó polémica, el señor López de Haro, han gozado siempre de una alegre libertad sexual, han vivido el enorme misterio del sexo con naturalidad. Todo lo contrario de los guiados por la Gay Guide. No quiero llevar a tragedia griega el problema, aunque hay casos extremos, pero sospecho que más de uno del mundo de las amistades particulares rechazara el jolgorio mundial de esta guía. Que no sé donde colocar. Si al lado de una guía de canarios, tipos tan fornicadores a mediodía en la soleada primavera de sus jaulas”

Seguramente se Blanco Amor chegou a ler esta crónica do seu amigo riría con suficiencia, el que pateou, coa súa fasquía de dandy, rúas, prazas, parques e alamedas á procura do amor, moi seguramente tamén os xardíns das Avenidas, o mesmo ca un paxaro, aí tiña razón Cunqueiro, na solleira primavera da súa gaiola.

avenidas

Xardíns das Avenidas, en Vigo, denantes da súa remodelación. Nese verxel sitúa Cunqueiro, ao fío da guía gay Spartacus de 1976, os encontros sexuais dos gays vigueses.

2 Respostas to “Cunqueiro, Blanco Amor e a Galician Gay Question”

  1. Alba Nogueira López Agosto 28, 2013 ás 4:10 PM #

    Para ti e para o Sr. Cunqueiro, logo. Grazas polo artigo!

    Inventario de lugares propicios al amor
    Ángel González

    Son pocos.
    La primavera está muy prestigiada, pero
    es mejor el verano.
    Y también esas grietas que el otoño
    forma al interceder con los domingos
    en algunas ciudades
    ya de por sí amarillas como plátanos.
    El invierno elimina muchos sitios:
    quicios de puertas orientadas al norte,
    orillas de los ríos,
    bancos públicos.
    Los contrafuertes exteriores
    de las viejas iglesias
    dejan a veces huecos
    utilizables aunque caiga nieve.
    Pero desengañémonos: las bajas
    temperaturas y los vientos húmedos
    lo dificultan todo.
    Las ordenanzas, además, proscriben
    la caricia ( con exenciones
    para determinadas zonas epidérmicas
    -sin interés alguno-
    en niños, perros y otros animales)
    y el «no tocar, peligro de ignominia»
    puede leerse en miles de miradas.
    ¿Adónde huir, entonces?
    Por todas partes ojos bizcos,
    córneas torturadas,
    implacables pupilas,
    retinas reticentes,
    vigilan, desconfían, amenazan.
    Queda quizá el recurso de andar solo,
    de vaciar el alma de ternura
    y llenarla de hastío e indiferencia,
    en este tiempo hostil, propicio al odio.

  2. Tozeur Setembro 5, 2013 ás 7:09 PM #

    Gustoume. Ese punto xusto de sensibilidade e distancia

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s

%d bloggers like this: